Сцены мембранамі:
Век адмысловы!
Ноччу прыёмнік уключыць сусед,
І зарычаць меднагорлыя словы —
Перанаселены словамі свет.
То зацілінькаюць балалаечна,
То замурлыкаюць, як каты.
Лаюць лаяльна,
Джаляць і лашчацца.
Словы — драпежнікі.
Словы — браты.
Скрынка прыёмніка —
ёмкай прыёмнаю
Слоў —
надзвычайных замежных паслоў.
Рушылі
у наступленне
бяздомныя,
Самыя грозныя арміі слоў...
З лесу, дзе часта знаходзілі сховы мы,
Робяць паперу, а не дамы.
І высяцца гмахамі стопавярховымі
Нованароджаныя тамы.
Гул дыфірамбаў стукае ў ямбы.
Самы агідны — ружовы паклёп...
Людзі, рыхтуйце высотныя дамбы:
Словы рыхтуюць сусветны патоп!