Што робяць у Ялце?
Купаюцца і загараюць.
Сноўдаюць па асфальце —
Падэшвы свае здзіраюць.
Куды падзецца людзям
З вызваленымі рукамі?
— Працавікі —
мы будзем
Часовымі лайдакамі...
Едуць збываць змору,
Глыток свабоды зведаць.
Едуць па сонца і мора,
І па каханне едуць.
Да вечнага хвалявання
Хочацца дакрануцца.
У бездань, стаіўшы дыханне,
Хочацца акунуцца.
Тых,
хто ад спёкі смягне
І ачышчэння прагне,
Мора ў трымценні дымкі
Прымае ў свае абдымкі.
І ні ўгавор,
ні змова
Не папярэдзяць фініш...
Цябе я пакіну, мора,
Ды ты ўжо мяне не пакінеш.
Я прыкладу на світанні
Ракавіну да вуха —
І зноўку тваё ракатанне
Пачуецца дрогка і глуха.
* * *