То шоўкам касынак касых,
То бляхай плашчоў лапочаце.
Вецер датычыць усіх,
Хочаце вы ці не хочаце!
Зялёныя астраўкі,
Чаромхавая каранацыя...
Лагодна рука да рукі
Так незнарок дакранаецца...
І не ўмяшчаюць сады
Спозненых пастаяльцаў.
Спеляцца вішняў плады
У завязі цёплых пальцаў.
Хоць ноч па зямлі ідзе,
Ад квецені светла да раніцы.
Не могуць схавацца нідзе
Абраннікі і абранніцы...
Іх, як сябе саміх,
Спаткаеце вы і збочыце.
Вецер датычыць усіх,
Хочаце вы ці не хочаце.
Шчоўкаю ў лад салаўю:
Песняю сэрца заселена...
Сонца прыгоршчамі п'ю!
Ветрана. Молада. Зелена.
* * *