На каменным тратуары —
Чалавечая рака.
Твары. Твары. Твары. Твары.
У руцэ плыве рука.
Гулка цокае абутак.
Незнаёмы друг, дазволь
Прачытаць на твары смутак,
Прачытаць на твары боль.
Прачытаць на твары радасць,
Гнеў, і злосць, і весялосць,
Прачытаць на твары градус
Цеплыні, што ў сэрцы ёсць.
Прачытаць на твары мару,
Страх, які душу шкрабе...
Безаблічнасць не да твару,
Чалавечы твар, табе!
Сонца цёплымі рукамі
Агалі і прасвятлі
Твар у дрэва, твар у камня,
Твар у неба і зямлі...
Нас глытае ў мерным гудзе,
Як канвеер, тратуар.
Не хавайце твараў, людзі,
А глядзіце твар у твар.