Мне падабаецца ворыва:
Нырае нарог да паловы,
Зямля зачапляецца здорава,
Як за кручок рыбалова.
Скачыце ад радасці, дзежкі!
Народзіць грудастая глеба
І зерне, і добрыя ўсмешкі
Тых, хто чакаюць хлеба.
З усіх перамог перамога —
Братэрства зямлі і метала.
Я знаю,
мяне самога
За плугам не раз матала.
Пралягуць барозны доўгія
Блішчастаю русай палоскаю.
Глядзіце —
зямля аздоблена
Такою цудоўнай прычоскаю,
Нібы грабянцом умела
Правёў па планеце хтосьці...
Вось гэта, я разумею —
Клопат аб прыгажосці!