Вуліца. Асфальт. Сляды.
Рух адвечны, мурашыны
Чалавечай грамады...
Капыты. Падэшвы. Шыны.
Ты ідзеш — і я іду.
Едзеш — я таксама еду.
Шлях усмешкаю суседу
Асвятляю на хаду.
Як найлепшая з дарог
Вуліца кладзецца ўпокат
Да людскіх нястомных ног.
Шолах. Шоргат. Стукат. Цокат.
Цісну хуткасць — уздыханні
Я б яшчэ паскорыць мог...
Светафор на скрыжаванні
Валадарыць, быццам бог.
Хочацца, прагнаўшы скруху,
У разбегу верыць мне,
Што машын ілбамі ў руху
Вуліца не сутыкне...
Светафор, чаму з нядзелі
Воч тваіх паблякла шкло?
Ты аўтобусу надзеі
Дай зялёнае святло!