Зруйнаванымі сёламі
Па дарогах вайны
Адыходзілі ў полымі
За бацькамі сыны.
Шынялі апранулі
Навырост хлапчукі.
І глядзелі матулі
Ім услед з-пад рукі.
Хлопцы з сэрцамі ўпартымі,
Не схіліліся вы,
Вам вучнёўскаю партаю
Быў акоп франтавы.
Не баяліся сталі
І варожых штыкоў,
У баях вырасталі
Вы да славы бацькоў.
Моўчкі падалі ў замеці
Каля вогненных рэк.
Засталіся вы ў памяці
Хлапчукамі навек.
Сёння дом ваш — планета.
І на нас нездарма
Вы глядзіце з партрэтаў,
Быццам памяць сама.