Сюды, ў лясное царства,
На досвітку ступі,
Як лепшае лякарства,
Настой паветра пі.
У кроне на сасонцы
Сярод галін завяз,
Як скальпель, промень сонца,
Нацэлены на вас...
У цішыні дрымотнай
Яліны, што наўкол,
Іголкаю няшчотнай
Тут зробяць вам укол.
І прымеце, як лекі,
У засені бяроз
З зялёнае аптэкі
Сто тысяч кропель рос,
Што ад знямогі лечаць...
Няхай ужо гады
Не ціснуць вам на плечы,
Як мулкія пуды.
Гукаю ўсіх сяброў я:
Спяшаюся ў паход!
Лясны палац здароўя
Працуе круглы год.