Сонца ўзышло. Пералівамі грае,
Мірыядамі іскраў у росах заззяла,
І збудзіла гудкі над азораным краем,
І радасць палям на праменнях паслала.
Кожны ў працы герой, кожны з сэрцам агністым
Будзе шчасце каваць на штодзень, на вякі,
Бо тут сонца знайшло сваю мірную прыстань,
Яно іскрамі пырскае з кожнай рукі.
Няхай ведаюць — чуюць у свеце пачвары,
Як зямля харашыцца пад нашай нагой,—
Гэта нашыя радасці, нашыя мары,
Гэта сонца радзімы маёй дарагой!