Маладых паэтаў кадры
Намякаюць далікатна:
«Шмат вы рыфмаў настругалі,
Бэз увесь паабстрыгалі.
Вам пара закончыць песні
І падбаць адносна пенсій».
А якая там пара —
Іскры сыпяцца з пяра.
Чуеш — іскры, не пясок,
Сад зялёны не пасох.
Сіні верас, сіні верас,
Нам дзяўчаты покуль вераць.
А як верыць перастануць,
На улік пенсійны станем.
Будзем трутнямі гудзець,
Будзем з зайздрасцю глядзець,
Як чарнявы падшыванец
Прыгажуню ў сад вядзе.
1963