epub
 
Падключыць
слоўнікі

Уладзімір Караткевіч

Вершы не дапамаглі

Вецер кнігу на акне чытае;

Скучыў і старонкі стаў лічыць.

Верш засыпаў бэзам адквітаючым,

Што стаіць у сінім гарлачы.

Бы сказаў: «Куды ты, братка, лезеш

Са сваім каханнем і тугой?

Іх не параўнаць з цвіценнем бэзу,

З кветкамі вільготнымі яго».

І каханая на падваконні,

Сціснуўшы сукенку паміж пят,

З-пад прасвечанай глядзіць далоні

На нясмелы лёт галубянят.

 

[1968 г. ?]




Беларуская Палічка: http://knihi.com