Дым імкнецца ў неба
Як вязень на волю
І знікае не разумеючы волі
Дым узветраныя валасы ведзьмы
Якая жыве ў агні
Можа схавацца ў дыме
І можа згубіцца ў дыме
І паўзе дым па зямлі як цмок
Якому адсеклі галаву
У якога душа - дагараючае вогнішча
І ніхто не любіць дыму
Дым самагубца
І ў яго жыццё кароткае
Як летняя купальская ноч
Дзе дзяўчаты і хлопцы
Скачуць праз вогнішча
Узлятаючы як дым
І гляджу я на дым
Як на густую павуціну
У якой трапечуцца зоркі
Як залатыя камары