Канон малебны да прасвятой багародзiцы

Спяваецца пры ўсякiм смутку душэўным і няшчасці. Твор манаха Феасцірыкта

Глас 8
Песня 1

Ірмос: Ваду́ прайшо́ўшы ні́бы су́шу і егі́пецкага лі́ха пазбе́гнуўшы, ізраільця́нін ускліка́ў: Збаві́целю і Бо́гу на́шаму спява́йма.

Прасвята́я Багаро́дзіца, спасі́ нас.

Мно́гімі апанава́ны выпрабава́ннямі, да Цябе́ я звярта́юся ў по́шуках спасе́ння: О, Ма́ці Сло́ва і Дзе́ва, ад ця́жкіх і бе́дстваў спасі́ мяне́!

Прасвята́я Багаро́дзіца, спасі́ нас.

Турбу́юць мяне́ напа́ды страсце́й, які́я напаўня́юць душу́ маю́ вялі́каю марко́таю; супако́й яе́ мі́рам Сы́на і Бо́га Твайго́, Дзе́ва Усебеззага́нная.

Сла́ва Айцу́, і Сы́ну, і Свято́му Ду́ху.

Цябе́, што нарадзі́ла Спасі́целя і Бо́га, малю́ я, Дзе́ва, аб збаўле́нні мяне́ ад бе́дстваў; да Цябе́ цяпе́р звярта́ючыся, я скіро́ўваю і душу́, і розум.

І цяпе́р, і заўсёды, і на ве́кі вяко́ў. Амі́нь.

Хво́рага це́лам і душо́ю наве́двання Бо́жага і кло́пату ад Цябе́ спадо́бі, адзі́ная Багама́ці, бо Ты до́брая і До́брага нарадзі́ла.

Песня 3

Ірмос: Нябе́снага ку́пала Верхатво́рца Го́спадзі і Царквы́ Ствары́цель, умацу́й мяне́ ў любо́ві да Цябе́, Ты, мэ́та маі́х імкне́нняў, апо́ра ве́рных, адзі́ны Чалавекалю́бец.

Прасвята́я Багаро́дзіца, спасі́ нас.

Абаро́наю і по́крывам жыцця́ майго́ лічу́ я Цябе́, Богарадзі́целька Дзе́ва: Ты мяне́ скіру́й да пры́стані Тваёй, Віно́ўніца дабро́т, апо́ра ве́рных, адзі́ная Усяпе́тая1.

Прасвята́я Багаро́дзіца, спасі́ нас.

Малю́ Цябе́, Дзе́ва: душэ́ўную збянтэ́жанасць і бу́ру сму́тку майго́ разгані́, бо Ты, Боганяве́ста, крыні́цу спако́ю — Хрыста́ нарадзі́ла, адзі́ная Прачы́стая.

Сла́ва Айцу́, і Сы́ну, і Свято́му Ду́ху.

Ты нарадзі́ла Дабрадзе́я, дабра́ Віно́ўніка, а таму́ бага́ццем дабрадзе́йства ўсіх адары́, бо Ты ўсё мо́жаш, пако́лькі мо́цнага сі́лаю Хрыста́ нарадзі́ла Ты, Богаблажэ́нная.

І цяпе́р, і заўсёды, і на ве́кі вяко́ў. Амі́нь

Дзе́ва, ты дапамажы́ мне, зму́чанаму лю́тымі не́мачамі і балю́чымі страсця́мі, бо я зна́ю Цябе́, Найбеззага́ннейшая, як ска́рбніцу ацале́нняў бага́тую і невычарпа́льную.

Захава́й ад бед рабо́ў Тваі́х, Багаро́дзіца, бо мы ўсе пасля Бо́га да Цябе́ звярта́емся, як да несакруша́льнай сцяны́ і абаро́ны.

Спагля́нь з міласэ́рнасцю, усяпе́тая Багаро́дзіца, на мае́ лю́тыя цяле́сныя паку́ты і ацалі́ не́мач душы́ маёй1.

Сядален, глас 2

Гара́чая малі́тва і сцяна́ непрысту́пная, мі́ласці крыні́ца, све́ту прыста́нішча, мы шчы́ра ўскліка́ем да Цябе́: Багаро́дзіца Улады́чыца, паспяшы́ і збаў нас ад бед, адзі́ная ско́рая абаро́нніца.

Песня 4

Ірмос: Пачу́ў я, Го́сподзі, пра таі́нства заду́мы Тваёй, уразуме́ў спра́вы Твае́ і прасла́віў Тваё Бажаство́.

Прасвята́я Багаро́дзіца, спасі́ нас.

Страсце́й маі́х узбурэ́нне і бу́ру маі́х саграшэ́нняў уціхамі́р, Боганяве́ста, Яка́я нарадзі́ла Стырнаво́га — Го́спада.

Прасвята́я Багаро́дзіца, спасі́ нас.

Пада́й мне Тваю́ бязме́жную міласэ́рнасць у адка́з на мой за́клік да Цябе́, Яка́я нарадзі́ла Міласэ́рнага і Спасі́целя для ўсіх, хто апява́е Цябе́.

Прасвята́я Багаро́дзіца, спасі́ нас.

Ма́ючы асало́ду ад Тваі́х даро́ў, Прачы́стая, мы спява́ем удзя́чную пе́сню, прызнаючы́ Цябе́ за Багама́ці.

Сла́ва Айцу́, і Сы́ну, і Свято́му Ду́ху.

На ложы ў хваро́бе сваёй і не́мачы ляжу́ я, таму́ дапамажы́ мне як Дабралюбі́вая1, адзі́ная Вечнадзе́ва.

І цяпе́р, і заўсё́ды, і на ве́кі вяко́ў. Амі́нь.

Надзе́ю і апо́ру, і непару́шную сцяну́ спасе́ння ма́ючы ў Табе́, Усяпе́тая, мы ад уся́кай ця́жкасці збаўля́емся.

Песня 5

Ірмос: Прасвятлі́ нас нака́замі Тваі́мі, Го́сподзі, і сі́лаю2 Тваёю высо́каю Тво́й мір пада́й нам, Чалавекалю́бец.

Прасвята́я Багаро́дзіца, спасі́ нас.

Напо́ўні, Чы́стая, весяло́сцю сэ́рца маё, Тваю́ чы́стую3 даючы́ ра́дасць, бо Віно́ўніка весяло́сці нарадзі́ла Ты.

Прасвята́я Багаро́дзіца, спасі́ нас.

Збаў нас ад бед, Багаро́дзіца Чы́стая, што нарадзі́ла ве́чнае Збаўле́нне і мір, які перавыша́е ўся́кае разуме́нне.

Сла́ва Айцу́, і Сы́ну, і Свято́му Ду́ху.

Рассе́й імглу́ саграшэ́нняў маі́х, Боганяве́ста, праме́ннем Твайго́ ззя́ння, Ты, што нарадзі́ла Святло́ Бажэ́ственнае спрадве́чнае.

І цяпе́р, і заўсёды, і на ве́кі вяко́ў. Амі́нь.

Ацалі́, Чы́стая, душы́4 маёй не́мач, спадо́біўшы мяне́ Тваёй апе́кі, і здаро́ўе малі́твамі Тваі́мі пада́й мне.

Песня 6

Ірмос: Малі́тву я праллю́ да Го́спода і Яму́ адкры́ю бе́ды мае́, таму што́ злом душа́ мая́ напо́ўнена і жыццё маё да пе́кла наблі́жана. І малю́ся я, як Іо́на: ад згу́бы, Бо́жа, вы́баў мяне́!

Прасвята́я Багаро́дзіца, спасі́ нас.

Як Сам Той, Хто адда́ў Сябе́ на смерць, спас ад сме́рці і згу́бы маю́ істо́ту, ахо́пленую згу́баю і сме́рцю, так Ты, Дзе́ва, малі́ Го́спада і Сы́на Твайго́ зба́віць мяне́ ад ліхадзе́йства во́рагаў.

Прасвята́я Багаро́дзіца, спасі́ нас.

Як Абаро́нніцу жыцця́ Цябе́ зна́ю і захава́льніцу надзе́йную, Дзе́ва, Яка́я спыня́е мно́ства спаку́с1 і адво́дзіць зло́бу дэ́манаў; і малю́ся заўжды́: ад згу́бы страсце́й маі́х збаў мяне́.

Сла́ва Айцу́, і Сы́ну, і Свято́му Ду́ху

Мы ма́ем, Цябе́, Дзе́ва, як сцяну́ абаро́нную, як уседаскана́лае спасе́нне душ і ўце́ху ў няго́дах, і святлу́ Твайму́ заўжды́ ра́дуемся: О, Улады́чыца, і цяпе́р нас ад страсце́й і бед урату́й.

І цяпе́р, і заўсёды, і на ве́кі вяко́ў. Амі́нь.

На пасце́лі цяпе́р я хво́ры ляжу́, і няма́ ацале́ння пло́ці маёй, але́ да Цябе́ я малю́ся, До́брая, Яка́я нарадзі́ла Бо́га і Спасі́целя све́ту, і Збаві́целя ад не́мачаў: ад згу́бы не́мачаў падымі́ мяне́.

Кандак, глас 6

Абарона хрысціян надзе́йная, Хадайніца да Тварца нязме́нная, не пагарджа́й малітвамі грэ́шнікаў, а паспе́й, як Добрая, на дапамогу нам, што з вераю ўсклікаем да Цябе́: паспяшайся на засту́пніцтва і хутка прыйдзі на хада́йніцтва, абараня́ючы заўжды, Багаро́дзіца, тых, хто шануе Цябе́.

Другi кандак, глас той жа

Няма́ ў нас і́ншае дапамогі, няма́ і́ншае надзе́і, акрамя́ Цябе́, Прачы́стая Дзе́ва. Ты нам дапамажы́, на Цябе́ спадзяёмся мы і Табо́ю хва́лімся, бо Твае́ мы рабы́, няха́й жа не пасаро́меемся.

Сцiхiра, глас той жа

Не даруча́й мяне́ чалаве́чай абаро́не, Прасвята́я Улады́чыца, а прымі́ мале́нне раба́ Твайго́; бо няго́ды агарну́лі мяне́, я не магу́ цярпе́ць дэ́манскіх стрэ́л, прыту́лку не ма́ю і нідзе́ не знахо́джу прыста́нішча, няшча́сны я, адусю́ль напада́юць на мяне́, і ўце́хі не ма́ю, акрамя́ Цябе́, Улады́́чыца све́ту, надзе́я і абаро́на ве́рных, не пагарджа́й малі́твай маёй і зрабі́ то́е, што кары́сна мне.

Песня 7

Ірмос: Юнакі́, які́я з Іудзе́і прыйшлі́, не́калі ў Вавіло́не ве́раю ў Тро́іцу по́лымя ў пе́чы перамаглі́, спява́ючы: Бо́жа айцо́ў, благаславёны Ты.

Прасвята́я Багаро́дзіца, спасі́ нас.

Жада́ючы на́ша спасе́нне здзе́йсніць, Спасі́целю, Ты ўсялі́ўся ва ўло́нне Дзе́вы, Яку́ю ўчыні́ў Ты Засту́пніцай све́ту; айцо́ў на́шых Бо́жа, благаславёны Ты.

Прасвята́я Багаро́дзіца, спасі́ нас.

Прыхі́льніка мі́ласці, яко́га нарадзі́ла Ты, Ма́ці чы́стая, умалі́, каб пазба́віліся ад саграшэ́нняў і душэ́ўнага бру́ду ты́я, што з ве́раю ўскліка́юць: айцо́ў на́шых Бо́жа, благаславёны Ты.

Сла́ва Айцу́, і Сы́ну, і Свято́му Ду́ху.

Як ска́рбніцу спасе́ння і крыні́цу нятле́ння, і надзе́йную цвярды́ню, і дзве́ры пакая́ння Ты паказа́ў Ту́ю, Яка́я нарадзі́ла Цябе́, тым, што ўскліка́юць: айцо́ў на́шых Бо́жа, благаславёны Ты.

І цяпе́р, і заўсёды, і на ве́кі вяко́ў. Амі́нь.

Цяле́сныя сла́басці і душэ́ўныя не́мачы, Богарадзі́целька, тых, што з любо́ўю прыхо́дзяць пад по́крыва Тваё, спадо́бі ацалі́ць, Дзе́ва, Яка́я Спасі́целя Хрыста́ нам нарадзі́ла.

Песня 8

Ірмос: Цара́ Нябе́снага, Яко́га апява́юць1 во́інствы А́нгелаў, апява́йце і ўслаўля́йце і высо́ка ўзно́сце ва ўсе ве́кі.

Прасвята́я Багаро́дзіца, спасі́ нас.

Не пагарджа́й, Дзе́ва, ты́мі, хто про́сіць Тваёй дапамо́гі, апява́ючы і высо́ка ўзно́сячы Цябе́ на ве́кі.

Прасвята́я Багаро́дзіца, спасі́ нас.

2 Не́мачы душы́ маёй і цяле́сныя хваро́бы Ты ацаля́еш, Дзе́ва, каб я праслаўля́ў Цябе́, Чы́стая, на ве́кі3.

Сла́ва Айцу́, і Сы́ну, і Свято́му Ду́ху.

Ацале́нняў мно́ства Ты выліва́еш на тых, хто апява́е Цябе́, Дзе́ва, і высо́ка ўзно́сіць невымо́ўна Наро́джанага Табо́ю.

І цяпе́р, і заўсёды, і на ве́кі вяко́ў. Амі́нь.

На́ціскі спаку́с і напа́ды страсце́й адганя́еш Ты, Дзе́ва, таму́ мы апява́ем Цябе́ ва ўсе ве́кі.

Песня 9

Ірмос: Справядліва Багаро́дзіцай мы вызнаём Цябе́, праз Цябе́ спасёныя, Дзе́ва Чы́стая, з хара́мі бяспло́тных сіл Цябе́ веліча́ючы.

Прасвята́я Багаро́дзіца, спасі́ нас.

Не пагарджа́й пато́кам слёз маі́х, Дзе́ва, што нарадзіла Хрыста, Які выціра́е з ко́жнага тва́ру ко́жную слязу́.

Прасвята́я Багаро́дзіца, спасі́ нас.

Радасцю сэ́рца напоўні маё, Дзе́ва, Якая атрыма́ла паўнату́ ра́дасці і зні́шчыла боль граху́.

Прасвята́я Багаро́дзіца, спасі́ нас.

Прыста́нішчам і абаро́наю будзь, Дзе́ва, тым, хто звяртаецца да Цябе́, сцяно́ю несакруша́льнаю, прыту́лкам, і по́крывам, і ра́дасцю.

Сла́ва Айцу́, і Сы́ну, і Свято́му Ду́ху

Святла́ Твайго́ праме́ннем разганя́ючы це́мру няве́дання, асвятлі́, Дзе́ва тых, хто з паша́наю вызнае́ Цябе́ Багаро́дзіцаю.

І цяпе́р, і заўсёды, і на ве́кі вяко́ў. Амі́нь.

На ме́сцы паку́т ад хваро́бы ацалі́ таго́, хто ўпако́рыўся, Дзе́ва, не́мач у здаро́ўе ператвара́ючы.

Сцiхiры, глас 2

Вышэ́йшую за нябёсы і чысце́йшую за святло́ со́нечнае, Ту́ю, што зба́віла нас ад праклёну, Улады́чыцу све́ту спе́вамі ўшану́ем.

Ад мно́ства маі́х грахо́ў хварэ́е це́ла, хварэ́е і душа́ мая́; да Цябе́ я звярта́юся, Благада́тнай: Надзе́я безнадзе́йных, Ты мне дапамажы́.

Улады́чыца і Ма́ці Збаві́целя, прымі́ малі́тву недасто́йных рабо́ў Тваі́х, каб хада́йнічаць пе́рад Наро́джаным ад Цябе́. О, Улады́чыца све́ту, будзь хада́йніцаю!

Стара́нна і ра́дасна мы спява́ем цяпе́р пе́сню Табе́, усі́мі апе́тай Багаро́дзіцы: з Прадце́чаю і ўсі́мі святы́мі малі́, Багаро́дзіца, Бо́га быць мі́ласцівым да нас.

Усе во́інствы А́нгелаў, Прадце́ча Гаспо́дні, двана́ццаць Апо́сталаў, усе святы́я з Багаро́дзіцаю, учыні́це малі́тву, каб спаслі́ся мы.

Малiтва 1
да Прасвятой Багародзiцы 1

Цары́ца мая́ найдабрэ́йшая, надзе́я мая́, Багаро́дзіца, прыту́лак для сіро́т і абаро́нніца падаро́жных, гаро́тных ра́дасць, пакры́ўджаных апяку́нка! Ты ба́чыш маю́ бяду́́, Ты ба́чыш маё го́ра; дапамажы́ мне як не́мачнаму, скіру́й мяне́ на шлях як падаро́жнага. Кры́ўду маю́ Ты ве́даеш, вы́звалі з яе́, як жада́еш, бо няма́ ў мяне́ і́ншае дапамо́гі, апро́ч Цябе́, ні і́ншае абаро́нніцы, ні до́брае суцяша́льніцы, акрамя́ цябе́, о Багама́ці,бо Ты заха́ваеш мяне́ і абаро́ніш на ве́кі вяко́ў. Амі́нь.

Малiтва 2

Каго́ бу́ду клі́каць, Улады́чыца? Да каго́ звярну́ся ў журбе́ маёй, калі́ не да Цябе́, Цары́ца Нябе́сная? Хто плач мой і ўздыха́нне маё пры́ме, калі́ не Ты, Найбеззага́ннейшая, надзе́я хрысція́н і прыста́нішча нам, грэ́шным? Хто лепш за Цябе́ ў напа́сцях абаро́ніць? Пачу́й жа стогн мой і схілі́ ву́ха Тваё да мяне́, Улады́чыца, Ма́ці Бо́га майго́, і не пагарджа́й мно́ю, які́ патрабу́е Тваёй дапамо́гі, і не адкі́нь мяне́ грэ́шнага. Наста́ў на ро́зум і навучы́ мяне́, Цары́ца Нябе́сная, не адступі́ ад мяне́, раба́ Твайго́, за нарака́нне маё, а бу́дзь мне Ма́ці і Засту́пніцай. Уруча́ю сябе́ мі́ласцівай апе́цы Тваёй: прывядзі́ мяне́, грэ́шнага, да ці́хага і спако́йнага жыцця́, каб я апла́кваў грахі́ свае́. Бо да каго́ звярну́ся я, вінава́ты, калі́ не да Цябе́, надзе́і і прыста́нішчу для грэ́шных, акрыля́емы спадзява́ннем на невымо́ўную мі́ласць Тваю́ і шчо́драсці Твае́? О Улады́чыца, Цары́ца Нябе́сная! Ты мая́ надзе́я і прыста́нішча, прыту́лак і  засту́пніцтва, і дапамо́га. Цары́ца мая́ найдабрэ́йшая і ско́рая Засту́пніца! Пакры́й Тваі́м хада́йніцтвам мае́ саграшэ́нні, абарані́ мяне́ ад во́рагаў ба́чных і няба́чных; змякчы́ сэ́рцы злых людзе́й, што паўстаю́ць на мяне́. О, Ма́ці Го́спада майго́, Тварца́! Ты — ко́рань дзяво́цтва і неўвяда́льная кве́тка чысціні́. О, Багаро́дзіца! Ты пада́й дапамо́гу мне, не́мачнаму ад пло́цкіх страсце́й і няду́жнаму сэ́рцам, бо то́лькі Тваё і з Табо́ю Твайго́ Сы́на і Бо́га на́шага ма́ю засту́пніцтва; і Тваі́м найцудо́ўнейшым засту́пніцтвам няха́й зба́ўлюся я ад усяля́кай бяды́ і напа́сці, о, найбеззага́ннейшая і найслаўне́йшая Бо́жая Ма́ці Мары́я. Таму́ я з надзе́яй гавару́ і ўскліка́ю: ра́дуйся, Благада́тная, раду́йся, Абра́даванная; ра́дуйся, Найблагаславе́ннейшая, Гаспо́дзь з Табо́ю.

Малiтва 3

О, Прасвята́я Спада́рыня Улады́чыца Багаро́дзіца! Ты вышэ́йшая за ўсіх А́нгелаў і Арха́нгелаў і Пачэ́снейшая за ўсё стварэ́нне, Ты — памо́чніца пакры́ўджаных, безнадзе́йных надзе́я, убо́гіх засту́пніца, засму́чаных суцяшэ́нне, гало́дных кармі́́целька, го́лых адзе́нне, хво́рых ацале́нне, грэ́шных спасе́нне, хрысція́н усі́х дапамо́га і засту́пніцтва. О, усямі́ласцівая Спада́рыня, Дзе́ва Багаро́дзіца Улады́чыца, мі́ласцю Тваёю спасі́ і памі́луй1 Свяце́йшых патрыя́рхаў правасла́ўных2, праасвяшчэ́нных мітрапалі́таў, архіепі́скапаў і епі́скапаў і ўвесь свяшчэ́нніцкі і мана́скі чын, і ўсіх правасла́ўных хрысція́н ры́заю Тваёю пачэ́снаю ахава́й; і ўма́лі, Спада́рыня, Таго́, Хто без се́мені ўцяле́сніўся ад Цябе́ — Хрыста, Бо́га на́шага, каб Ён падпераза́ў нас сі́лаю Сваёю вышэ́йшаю на няба́чныя і бач́ныя во́рагі на́шы. О, усямі́ласцівая Спада́рыня Улады́чыца Багаро́дзіца, уздымі́ нас з глыбіні́ граху́ і збаў нас ад го́ладу, згу́бы, ад землятрасе́ння і пато́пу, ад агню́ і мяча́, ад нашэ́сця іншапляме́ннікаў і міжусо́бнай вайны́, і ад рапто́ўнае сме́рці, і ад напа́ду во́рагаў, і ад згу́бных вятро́ў, і ад смертано́снай зара́зы, і ад уся́кага зла. Пада́й, Спада́рыня, мір і здаро́ўе раба́м Тваі́м, усі́м правасла́ўным хрысція́нам, і асвятлі́ ім ро́зум і во́чы сэ́рца для спасе́ння; і спадо́бі нас, грэ́шных рабо́ў Тваі́х, Ца́рства Сы́на Твайго́, Хрыста́, Бо́га на́шага, бо ўлада́рства Яго́ благаславёнае і найпрасла́ўленае з Беспача́тным Яго́ Айцо́м і з Прасвяты́м і До́брым і Жыватво́рчым Яго́ Ду́хам, цяпе́р і заўсёды, і на ве́кі вяко́ў. Амі́нь.

 




Беларуская Палічка: http://knihi.com