epub
 
Падключыць
слоўнікі

Аляксей Пысін

«Мне экзотыка цяпер не міла...»

Мне экзотыка цяпер не міла,

Ды вярнуўся ў сне туды, назад.

Бухара. Цяністы сад эміра.

Хвост паўліна, як падвесны сад.

 

Быў бы я ў сваім дняпроўскім лесе, -

Гнуў бы дрэва, каб сарваць арэх.

Закрычаў паўлін: «Ты заглядзеўся

На красунь маіх. За гэткі грэх

 

Будзеш зараз пакараны люта!..»

Вежа. Паднябесны мінарэт.

І - лячу я ўніз без парашута,

Пакідаю добры белы свет.

 

Так ніколі не ляцеў, не падаў -

На вярсту зямную з той вярсты;

Сорак сем пражытых лістападаў,

Падсцяліце мне свае лісты!

 

1967

 




Беларуская Палічка: http://knihi.com