epub
 
Падключыць
слоўнікі

Алесь Дудар

Асыпае чэрвень белы сад

 

Асыпае чэрвень белы сад.

Сок калінавы лугі апаясаў...

Глянь, як раніцы чырвонае віно

срэбраногія бярозкі заліло!

 

Разважалі - быць нам ці не быць,

шмат зрабілі - трэба шмат яшчэ зрабіць...

Стаў на варце адзінокай сіні клён;

ўсім - і блізкім, і далёкім -

                                 наш паклон.

 

Прывітанне шчыра - ад душы...

Сіл няма такіх, каб нас перадушыць!

Мора пенай разаб'ецца аб граніт -

хай жа кажуць, што ні мэты, ні граніц.

 

Заплятайцеся, пралескі, у вянок -

плешча радасці чырвонае віно.

Будзе вецер сівагрывы варажыць

пра свае і пра чужыя рубяжы.

 

Што нам пацеркі з старых рабін?

Можам самі сабе сцежку церабіць;

хопіць сілы для чужых і для сваіх,

каб сабою перамогу засланіць.

 

Будзе праўда з тым, хто перамог,

пераможанаму - крыўда і ярмо...

Ой ты, клён сінегаловы, стройны клён,

па-над возерам празрыстым, быццам шкло!

 

Асыпае чэрвень белы сад.

Сок калінавы лугі апаясаў...

Нашай раніцы чырвонае віно

срэбраногія бярозкі заліло.

 

1927

 


1926

Тэкст падаецца паводле выдання: невядомае
Крыніца: невядомая

Беларуская Палічка: http://knihi.com