epub
 
Падключыць
слоўнікі

Алесь Дудар

Цені

Ах, цені, цені… паляглі вы

усходняй казкай на асфальт…

Сплылі разьлівам він гульлівых

на думак адзьвінеўшы жаль.

 

І я, як вы, блудзіў па сьвеце,

туляўся в выбаінах зор.

Мне ў вочы кідаў вецер смецьце

старых, забытых абразоў.

 

Цяпер ізноў спляліся цені

ў чароўны, казачны вузор,

а я ўжо зьдзейсьніў лятуценьні

ў чырвоных выбаінах зор.

 

І песьняй светлаю спавіты,

і адзьвінеў, адплакаў жаль…

І цені казкаю блакітнай

ляглі на гарадскі асфальт.


1925

Тэкст падаецца паводле выдання: Дудар А. Сонечнымі сьцежкамі. Мн., БДВ, 1925

Беларуская Палічка: http://knihi.com