epub
 
Падключыць
слоўнікі

Алесь Дудар

«Ў музеі залатую бранзалетку...»

Ў музеі залатую бранзалетку

я бачыў за празрыстым шклом -

яе пад старажытным курганом,

пазелянеўшую, знайшлі малыя дзеці.

 

І ў тыя дні раслі на полі кветкі...

І ланцужком, сатканым з васількоў,

стары мастак прывычнаю рукой

аздобіў залатую бранзалетку.

 

Мастацкі дух ніколі не памрэ.

Не пахаваць яго пад курганамі,

не вычарпаць гадамі і вякамі.

 

Яму ў агні пякельным не згарэць.

Ён вырвецца з багны разводдзем буйных рэк

і загарыцца зноў бліскучымі агнямі.

 

1925

 

 

Каментары

 

Паводле выд.: Дудар А. Вежа. Мінск, 1984.

 


1925

Тэкст падаецца паводле выдання: Расстраляная літаратура. Менск, Кнігазбор, 2008
Крыніца: http://bk.knihi.com

Беларуская Палічка: http://knihi.com