epub
 
Падключыць
слоўнікі

Алесь Дудар

Запляці залатую касу

 

Запляці залатую касу.

Выйдзі ў сад і вясне пакланіся.

Можа, ўспомніць былую красу

лістапада пажоўклае лісце...

Запляці залатую касу.

 

Дні і ночы развеюць туман...

На балоты, на росы развеюць...

Сож і Гомель!..

                Краіна мая!..

Паглядзі, як зара ружавее...

Дні і ночы развеюць туман.

 

Так было...

         Дык ці ж будзе так?..

Чуў я песні, і казкі чуў я.

Бачыў я тваіх рэк сінь і сталь,

думаў думу з табой залатую...

Так было, дык ці ж будзе так?

 

Праз палі, праз нізіны і ўзвышшы,

праз кудлатую сінь лясоў,

бачу, як навальнічыць выйшаў

з берагоў крутарогіх Сож

праз палі, праз нізіны і ўзвышшы.

 

Вецер, вецер! Рабінавы сум

над старым, над чужым і над новым...

Запляці ж залатую касу,

выйдзі ў поле спаткацца з вясною...

Вецер, вецер! Рабінавы сум.

 

Сож і Гомель!.. Краіна мая!..

Песням - шыр!.. Палынам - раздолле...

Разальюся песнямі я

пра тваю неапетую долю...

Сож і Гомель!.. Краіна мая!

 

Запляці залатую касу,

выйдзі ў свет і вясне пакланіся.

Можа, ўспомніць былую красу

лістапада пажоўклае лісце...

Запляці залатую касу.

 

1926

 


1926

Тэкст падаецца паводле выдання: невядомае
Крыніца: невядомая

Беларуская Палічка: http://knihi.com