БЕЛАРУСКАЯ ПАЛІЧКА

Алесь Гарун

«Божа мой! Я чую зноў...»

Божа мой! Я чую зноў —

Як мацнее ў мяне кроў.

 

А ў грудзях сэрца б’ецца,

Па галоўцы жа вінецца

 

Думка нова, ды старая,

А вагромна, а святая...

 

А ўсяму, ўсяму прычына:

Мая родная зямліна —

 

Ужо варушыцца, ўстае,

Падымаецца, жыве...

 

Гэта чую я без слоў,

Дык мацнее ў мяне кроў!..

1914

---

Тэкст падаецца паводле выдання: Гарун А. Сэрцам пачуты звон: Паэзія, проза, драматургія, публіцыстыка / Уклад. прадм. і камент. У.Казберука; Маст. У.Басалыга. - Мн.: Маст. літ., 1991, 359 с. [5] л. іл. партр.: іл. - (Спадчына).
Крыніца: скан