Хакей — о’кей!
Хакей у рытме веку.
Сядзі і млей,
пакуль ідзе хакей.
Сцякаюцца,
нібы ў святую Мекку,
На йгрышча тое тысячы людзей.
Хакей — мазгоў масаж, настрою — лекар.
Перад экранам сядзь і ўсмак хварэй!
Ну, што яшчэ патрэбна чалавеку?! —
Тут табе ў хаце Рым і Калізей!
Здаецца, клюшку ў рукі сам узяў бы,
Хоць за плячыма год неўправарот,
Як той Траццяк, злавіў бы ў лёце шайбу,
Дарвацца б толькі да яго варот!
Не, без хакею люд наш маху даў бы,
Здрабнеў бы духам чалавечы род!