Красавік —
Гэта першыя краскі вясны,
Некранутая сінь
Танканогай пралескі,
Рокат рэк гаваркіх,
Буйства сокаў зямных.
Вечна юнага часу
Ўрачыстая песня.
Красавік —
Абуджэнне салодкіх трывог,
Прадчуванне грымот,
Навальніц і маланак,
Шум крыві,
Неспакой,
Прага дальніх дарог,
Перадышкі кароткай
Прыветны паўстанак.
Красавік —
Галубы ў небе крыллем шасцяць,
Птахі міру і дружбы,
Надзей і сумлення.
Красавік —
Гэта час аднаўлення жыцця,
Гэта месяц,
Калі нарадзіўся
Ленін.
Можа быць, вось такім
Скрозь туману дымок
Уставаў красавік
Над драўляным Сімбірскам,
Запаліўшы над будучыняю
Аганёк,
Лёс Расіі гайдаючы
Разам з калыскай.
Можа быць, і не знала
Красуня рака,
Пяючы калыханку
На захадзе веку,
Што адсюль
Узнясецца над светам рука,
Каб злучыць у адну
Чалавечыя рэкі.
Красавік...
Вее ў твар
Цёплы вецер вясны.
Мы ідзём па зямлі,
Людзі новага часу.
І заўсёды між нас —
Бессмяротны Ільіч,
Поплеч з намі ідзе
Бессмяротны Ільіч,
Сэрцы нам саграе
Бессмяротны Ільіч
На шляху да вышынь
Чалавечага шчасця!
1960