«В начале бе Слово».
Біблія
Я вам так скажу, панове
(Па-расійску «господа»),—
Што было спачатку Слова,
А пасля была бяда.
Не марксісцкая выснова —
Старадаўні запавет:
Напачатку ўсё-ткі Слова,
А пасля з’явіўся Свет!
Даў Бог людзям сілу Слова,
А жывёлам немату.
Пазбягайце ж слова злога,
Злога духа за вярсту!
Словам здрадзіў Богу Юда,
Чым паслаў яго на крыж.
Абяцалі Словам цуды
Нам ці раз правадыры!
З іх адзін прызначыў дату
Пераходу ў райскі сад.
Не паспеў. Сябры сабрату
Далі выспятка пад зад!
Заключылі двое змову
(І ні вечка ім, ні дна!),
Напачатку — зноў жа Слова,
А пасля была вайна!
Доўга жыў тыран суровы,
Не гарланіх, не базлаў,
А паціху мовіў Слова,
А пасля на плаху слаў...
На зямлі нашай вялікай
Жыў герой малой зямлі,
Ён жаваным Словам клікаў
Ў развіты сацыялізм.
Гэта ён сыноў галовы
Слаў на згубу ў горны стан:
Напачатку — словы, словы,
А пасля Афганістан...
Быў гарлан перабудовы,
Меў без прывязі язык.
Напачатку толькі словы,
А пасля быў гучны пшык!
Быў шматтысячны парламент
Словы рэкамі плылі,
Ды сплылі... Пачаўся лямант
Кулакі у ход пайшлі!
Быў чэчэнец чарнабровы,
Стаў на сцежку Шаміля.
Зноў жа напачатку словы,
А Лефортава пасля...
Есць і ў нас сваёй гадоўлі
Свой парламент гаваркі,
Толькі люду цяжкай долі
Ад яго навар які?
Шмат законаў адмысловых
Тут затоптвалі штодня.
Напачатку — словы, словы,
А пасля адна грызня...
А як стала слоў замнога,
Перайшлі на рык і роў:
Паламалі злосна рогі
Найрахманаму з зуброў!
Я вам так скажу, панове,
Што заўважыў кагадзе:
Стане ў горле косткай Слова,
Быць сяму-таму ў бядзе!
1994