epub
 
падключыць
слоўнікі

Аркадзь Куляшоў

Ранак

 

Выходжу я ў разведку -

Рашучы заўтра бой.

Ты, ранак,

Будзь за сведку,

Услед ідзі за мной.

 

З табой у згодзе поўнай

Жылі мы з першых дзён.

У барацьбе няроўнай

Я трапіў у палон.

 

І рукі мне звязалі,

І ў плечы б'е прыклад.

«Вядзі! -

Мне загадалі. -

Паказвай шлях назад...»

 

Ты, ранак мой вялікі,

У час маіх няўдач

Пад ногі кідай пікі,

Дарогі перайнач.

 

Дзе рэчку помніў розум,

Там возера кладзі,

Дзе корч -

З карча бярозу

На месцы тым радзі.

 

Дупло зрабі з засечкі,

Хай птушка ў гэты дзень

Туды свае яечкі

Блакітныя кладзе.

 

У родную краіну

Дарогі перайнач.

А я? А я загіну.

А ты?

А ты не плач.

 

1940

 


1939

Тэкст падаецца паводле выдання: невядомае
Крыніца: невядомая