Той, хто начальству не лагодзіць,
мне цікавей таго, хто рад
любому блізкаму нашкодзіць,
каб толькі выканаць загад.
Каб потым выпрасіць кватэрку
ці нешта іншае з выгод.
Каб спакваля рабіць кар’ерку —
хоць па прыступачцы штогод.
Каб, зрэшты, вырвацца наперад,
а можа, нават у вярхі.
Галоўнае — няўтольны верад,
лухта — і крыўды, і грахі!
А гэны? Гэны — недарэка!
Чаго ён хоча? Што вярзе?
Супроць такога чалавека,
супроць самога бой вядзе!..
Каб зноў у ціхі сон не збочыць,
давайце будзем шанаваць
таго, хто праўду рэжа ў вочы
і ў справе ўмее шчыраваць.