epub
 
падключыць
слоўнікі

Барыс Жанчак

Цяпер

1
2
3
4


1

Тры рэчы ўсяго

А былі б не павінны

Зьдзіўляюць якраз:

Што я ў гэтым месцы

Што гэтай хвілінай

Што я сярод вас

 

2

свой лёс аналізуючы памалу

такою думкай баўлюся яшчэ я:

калі б мяне маленства не ламала

тады б юнацтва зьнішчыла дашчэнту

цяпер калі гадоў яшчэ не надта

і радасьць разуменьня не настала:

калі б мяне не лушчыла юнацтва

хіба такою б занялася сталасьць

а зараз за акном майго вагона

звычайная мільгае незвычайнасьць:

дык вось чаму апошнім перагонам

усьцешвае маршрут неаканчальны

 

 

3

зеленавата вуліцай праходжу

паўмроя-паўняведаньне-паўсон

заленаваўся тварыкам прыгожым --

нясталая пастава й парасон

па мітусьні снуюцца кросны сонца

ня тое каб застыглі

ды барджэй

стасуецца да соцыюму соцы-

юм але юмбрык даражэй

дзе ў пінжачку шчасьдівым фаліянтам

студэнт (відаць, што вечны!) да таго

ўжо звычны каб цікаўнасьць на халяву

задавальняць чытаючы бягом

вялізная-няўклюдная дзяржава

навокала пакінуўшы мяне

і сьцяг апошняй кропляю іржавай

варушыцца вышэй як на сьцяне

 

4

мы сягонняшнія жыхары

гэтак собіла хвалю трымаць пад нагамі

быць каменьнем асьнежаным гэтай гары

разам самай высокаю нотай у гаме

(гэта значыць, у шуме бязладным быцьця)

накавальні гарачае наканаваньне

падпірае бяскрыўднай надзеі працяг

прыстасавальніцтва – процістаяньне

раўнавагу ўважаем

мяркуем што мы

вастрыё гэтай думкі нацэленай

здрайцы

адганіце кароў

падцягніце штаны

вам пашчасціла з гэтымі промнямі

знайце

 

1990

 

 


1990-1993?

Тэкст падаецца паводле выдання: зборнік "Жменя насення"
Крыніца: электронны рукапіс