– Раскажы, дзядуля, казку.
Я тады засну адразу.
– Слухай жа, ў далёкі шлях
едзе Янка на валах,
едзе Янка на валах
круціць колы на калах...
– Бай далей, дзядуля, казку.
Я сасню лужок і краску.
– Там, далёка, дзень пры дні
едзе Янка на кані,
едзе Янка на кані,
не стамляецца ані...
– Раскажы яшчэ адну,
я ж тады скарэй засну.
– Слухай. Лесам за раку
едзе Янка на ваўку,
едзе Янка на ваўку
ў сіняй шапцы на баку...
– А яшчэ якая казка
ёсць на сьвеце, калі ласка.
– Слухай. Там, далёка недзе
едзе Янка на мядзьведзі,
едзе Янка на мядзьведзі,
едзе хлопец на мядзьведзі,
проста ў сон, здаецца, едзе.