Калі ты не падобны на віхрастую моркву,
альбо на прычасаны качанчык капусты,
матылькоў жоўтакрылых не ўчуеш гамонку
і зайцы да свайго карагоду не пусьцяць.
Калі ты не калматы баран ці авечка,
калі ты не стаіш як казёл на дарозе,
дык з ваўкамі не будзеш скакаць цераз рэчку,
не паедзеш зь мядзьведзем на паравозе.
Калі ты не плывеш качанём па затоцы,
калі сонцам павіснуць над гаем не ўмееш,
тым вялізным-чырвоным, магчыма, затое,
што настаўнік тлумачыць, хаця б разумееш?