начальнік твой пайшоў у адпачынак
зьехаў на засьмечаны бераг цёплага мора
а ты
зьнерваваны заўсёднай няпэўнасьцю
думаеш:
вось жа празь месяц ён вернецца
будзе зноў замінаць табе спакойна рабіць справу…
а я ўспамінаю таго рыцара царыцы палёў
які
пасьля цяжкога раненьня
радасным завітаў на родны падворак
і ў яго наперадзе быў цэлы тыдзень
вялікі-сьветлы тыдзень да атакі
да адчайнага бегу праз сьвінец і сьмерць
як ён па-гаспадарску паправіў страху на роднай хаціне
нарыхтаваў на зіму дроў
каб не знала клопату старэнькая матуля
і пазіраў усьміхаючыся на спакойнае сонца
і ты можаш сабе гэта ўявіць:
гэта было ў жыцьці твайго бацькі
гэта ёсць у памяці твайго народу…
ды й начальнік вяртаецца толькі празь месяц