некалі было ганарыліся:
колькі выйшла з гэтай вёскі:
два фельчары
настаўнікі чатыры
а меншы гэльчын кажуць даслужыўся
да капітана
але ўжо зараз лічым
колькі засталося ў той вёсцы
бабуль якія памятаюць песьні
і ўмеюць прасьці-ткаць ды вышываць
дзядоў што граюць на дудзе-жалейцы
плятуць кашы
да сьвята наштукуюць
гліняных-паліваных місак
збанкоў і хітрамудрых цацак
а колькі ў гэтай вёсцы засталося
шчасьлівых вечнай сувязьзю зь зямлёй
і вечным клопатам на ёй?