сягоньня і заўтра па тры прадстаўленьні –
ільвы на арэне
сягоньня і заўтра цары на калені
здарэньне ці не здарэньне?
і як то царам па тры разы кленчыць?
і што ўжо там за цары?
даўно прагнілі ільвяныя парэнчы
пры парку старым
пах ружы даўно абярнуўся калючкай
маліньнік зьдзічэў
ды й іх ужо досыць паблажліва вучаць
лагодна рычэць
паўзе паўсьляпы праз драцянае кола
як кошка таўсты
цікаўныя ўкруг па старому закону
падцялі хвасты
праз вока пустое ахвяру намацвае –
усіх не забіць
аднойчы прыблізна ў такой сітуацыі
паўсталі рабы
а гэтыя ж нейкія маюць выгоды –
не выберуць бой
а гэтыя
(праўда, прыніжаных шкода)
не дарасьлі да рабоў