Зелянеюць, зелянеюць
Лугі, сенажаці,
Пытаецца сын у мацеры,
Ды каторую ўзяці.
А ці тую багатую,
Што хораша ходзіць,
А ці тую сіраціначку,
Што ўсё добра робіць?
А ці тую багатую,
Што валы, каровы,
А ці тую сіраціначку,
Што чорненькі бровы?
Багатая, няўдалая
У садочку гуляла,
А бедная сіраціначка
Ўжо тры копы нажала.
У багатай, нехарошай
Валы паздыхаюць,
А ў беднай сіраціначкі
Бровы не зліняюць.