epub
 
падключыць
слоўнікі

Хведар Жычка

"Абяцала ты мне..."

Абяцала ты мне:

«Кожнай ноччу

да цябе прыходзіць буду ў снах,

цалаваць зажураныя вочы,

пальцамі гуляць у валасах...»

 

Адгарэла жоўтым жарам лета.

Выцвіў небасхіл маіх надзей:

не прыходзіш ноччу да мяне ты,

не прыходзіш да мяне і ўдзень.

 

Мусіць, там, у беспрадметным свеце,

ёсць адна труна — адна турма,

а імкнення ў смерць або ў бяссмерце

там няма.

Нічога там няма!..