— Сябры, вы — кемлівы народ,
і, хоць гэта нязвычна,
павінны мы правесці сход
дэ-ма-кра-тыч-на.
Каб не займацца балбатнёй,
а вырашаць праблемы,
я прапаную старшынёй
абраць Гвазда Ахрэма —
ён будзе сходам кіраваць,
як генерал парадам,
і не дазволіць парушаць
рэгламент
і парадак.
Пачнуцца спрэчкі — ты, Сцяпан,
адразу возьмеш слова,
заверыш: выканаем план
датэрмінова,
даклад пахваліш...
А пасля
Кукуля Антаніна
пакрытыкуе Васіля
па частцы дысцыпліны.
За ёй — ліфцёр Ганчар Янусь
са шчырай скрухай скажа
пра дужа беднае меню
ў сталоўцы нашай...
Ды абароніць Апанас
шэф-повара Сунклету:
маўляў, пячэ ў апошні час
смачнейшыя катлеты...
Яшчэ Мамоня-інжынер
падкіне прапанову —
маладажонам больш кватэр
даць у будынку новым...
Калі ж пачнуць мітынгаваць,
не будзь, Антон, авечкай —
сумей усіх перакрычаць:
«Спыняйце спрэчкі!!!»
Такі наказ свайму «актыву»
даваў прафорг Даніла Сліва.
Ды марны быў той інструктаж
бо сход прайшоў зусім інакш:
далі там перцу Сліву,
ягонаму «актыву»!