epub
 
падключыць
слоўнікі

Хведар Жычка

Між Дняпром і Сожам

Між Дняпром і Сожам

гэткія бары:

заблудзіцца можна

ў цёмным гушчары.

 

Між Дняпром і Сожам

гэткія палі:

каласіцца збожжа,

гнецца да зямлі.

 

Між Дняпром і Сожам

гэткія лугі,

што з травы мурожнай

не падняць нагі.

 

Між Дняпром і Сожам

гэткія сады,—

тонуць у іх вёскі,

тонуць гарады.

 

Між Дняпром і Сожам

шмат крутых дарог,

што былі прычынай

матчыных трывог.

 

Між Дняпром і Сожам

войны адгулі,—

косці зграй варожых

тлеюць у зямлі.