Наш новы дзень ступае па зямлі
дзяржаўным
гаспадарчым
цвёрдым крокам,
упэўнена,
паважна,
нетаропка,—
так дбайны сейбіт
крочыць па раллі,
калі не раб ён —
гаспадар шчаслівы,
адборным зернем засявае ніву.
Наш новы дзень ступае па зямлі.
Наш мірны дзень — нястомны працаўнік;
шахцёр — у шахце,
на палях — араты,
за пультам кіравання — аператар,
на стромкіх рыштаваннях—будаўнік;
ён промні ловіць дужымі рукамі,
па скронях пот сцякае ручайкамі...
Наш мірны дзень — нястомны працаўнік.
Наш кожны дзень напоўнены жыццём:
спакоем,
рухам,
шчасцем
і журбою,
адчаем,
верай,
суцяшэннем,
болем,
бо мы расцём,
наперад мы ідзём,
змагаемся,
шукаем,
адкрываем,
адно — спыняцца права мы не маем.
Наш кожны дзень напоўнены жыццём.
Наш ясны дзень — прадвеснік новых дзей,
як парастак,
што з зерня прарастае,
у рунь эпохі
ён сцяблінкай стане,
закаласіцца справамі людзей,
зачырванее нараджэння датай
для будучых паэтаў,
касманаўтаў.
Наш ясны дзень — прадвеснік новых дзей.
Наш светлы дзень — гісторыі працяг,
учорашніх задум і мар здзяйсненне,
імгненне эстафеты пакаленняў,
што з дня Кастрычніка
нясуць агністы сцяг
высока
над абжытаю планетай,
прарочым словам Леніна
сагрэтай.
Наш светлы дзень — гісторыі працяг.