Не тулі ў каракуль цёплы
твар прыгожы, малады.
Дождж? Ды гэта ж толькі кроплі,
пойдзе дождж, дык што ж тады?..
Ці ж цябе вучылі ў школе
гнуцца ветру, як трысцё,
ціхім перакаці-полем
пракаціцца праз жыццё?
Не, не гэтаму за партай
навучалі ўсе цябе,—
каб была заўсёды ўпартай
у жыцці, у барацьбе;
каб настойліва і смела
шляхам выбраным ішла,
каб не тлела, а гарэла
і ніколі не старэла —
маладой душа была;
каб патоп, не толькі кроплі,
не заліў юнацкіх мар!..
Не тулі ў каракуль цёплы
малады прыгожы твар!
1957