Нейтральныя воды...
Нейтральныя воды...
Для ўсіх караблёў тут —
раздолле,
свабода.
Мірны ты госць
ці нахабны пірат,—
ідзі куды хочаш:
наперад,
назад,
не спыніць цябе
аніякі дазор...
Нейтральныя воды —
нічыйны прастор,
нічыйны,
агульны —
не свой,
не чужы...
Крамсаюць па скуры
кілі-нажы.
Тралы і сеці
ўпіваюцца ў цела.
Грымяць на дасвецці
вучэбныя стрэлы.
Паветра свідруюць
без жалю радары...
Ніхто не вартуе,
ды кожны ўладарыць.
Звярыны закон тут
пануе спрадвеку.
Нейтральныя воды
прывыклі да здзекаў,
ні днём
і ні ноччу
спакою не знаюць...
Я ім не зайздрошчу —
я ім спачуваю,
усіхным,
нічыйным,
нейтральным тым водам,
бо маю Айчыну,
любоў
і свабоду!