epub
 
падключыць
слоўнікі

Хведар Жычка

Парада музы

Муза, прагная спакусы,

прытвараецца дзяўчынай:

фарбай вымазала вусны

і прыпудрыла маршчыны,

сівізну сваю прыправіць

хной і модным перманентам:

— Жніце кветкі ранняй славы,

легкадумныя паэты,

моднае цяпер убранне —

недаспелыя куплеты,

недаспелыя,

недапечаныя,

хмелем велічы

пераплеценыя.

З вершыкаў зялёненькіх —

вяночкі кучаравыя,

бязвусыя паклоннікі

скажуць:

«Гэта лаўры».

Ці ж не верыць маладым?

Слепіць вочы славы дым.

А затым?

Затым, вядома,

самі ўбачыце — салома!..