У зале гасціннай
арцелі «Малютка»
ідзе больш гадзіны
«пяцімінутка».
Сам,
Нам
і Галоўны
і члены праўлення
ламаюць галовы
над важнай праблемай
як час эканоміць
у новых умовах.
Даклад быў змястоўны
і льюцца прамовы,—
адзін аднаго
прыгажэй і цікавей
гавораць праўленцы
аб важнасці справы,
самакрытычна
памылкі ўскрываюць,
катэгарычна
яны абяцаюць:
дабіцца...
узяцца...
наладзіць...
змагацца...
Праўленцы клянуцца,
а час не чакае:
бяжыць і бяжыць ён,
мінае,
мінае...