Прапішыце, доктар, мне не Сочы,
не Афон, не Ялту, не Місхор,
не ўзбярэжжа, дзе прыбой грукоча,
не даліну руж між сініх гор,—
прапішыце лепш мне бераг Сожа,
мокры поплаў і сунічны бор,
сцежкі палявыя, луг мурожны,
між балот пясчаны касагор;
прапішыце мне парылку лазні
з венікам пякучым па спіне,
прапішыце шчэ дыету мне —
са смятанай грэцкія аладкі
і пасцель на сене пад павеццю,
каб падняцца дрогка на дасвецці.