Рэчы вялікіх людзей —
гадзіннікі і алоўкі,
кавенькі і насоўкі,
браслеты і пярсцёнкі,
нажнічкі і расчоскі,
падцяжкі і дзягі,
стрэльбы і біклагі,
піпкі і муштукі
і розныя там квіткі
ляжаць пад шклом у музеях пустых
не сведкамі таленту іх,
а глухім напамінкам аб тым,
што іх гаспадары
былі звычайнымі людзьмі:
хадзілі па зямлі,
елі,
пілі,
труціліся цыгарэтамі,
цкаваліся газетамі
аж да тае пары,
пакуль не сталі
бюстамі і партрэтамі.