Цудоўны край — «Славацкі рай»,
курортныя мясціны:
скалістыя вяршыні,
квяцістыя даліны.
На схілах гор —
адвечны бор,
ядловец пахне
і чабор.
Каменні —
самацветаў зліткі.
Над стромамі —
сцяжынак ніткі:
няверна ступіш —
і ў цясніну
цябе раптоўны сполах
скіне,
а ў той цясніне —
востры камень:
нагамі падай
ці рукамі...
Фашысты лезлі ў гэты край —
у пекла трапілі
ці ў рай?
Маўчыць аб тым «Славацкі рай».