epub
 
падключыць
слоўнікі

Хведар Жычка

Шрацінкі

Эканамічны «Эфект»
Прынцып прыстасаванца
Скарачэнне штатаў
Паскораны метад
Мадэрнае дзіця
Метамарфоза
Трактат
«Перабудоўшчык»
«Кампанія» у калгасе
«Брыгадны падрад»
Рамонт
Дружыннік-ілюзіяніст
Насуперак матэматыцы


Эканамічны «Эфект»

У цяслярскай справе

быў мастак Пахом:

каб паправіць браму,

разламаў ён дом.

 

 

Прынцып прыстасаванца

А ці быў бы ён ля місы,

каб не йшоў на кампрамісы?

 

 

Скарачэнне штатаў

Вучыць Ліса гаспадара:

— Прагані Сабаку з двара,

бо сядзіць ён ля дзвярэй

і палохае Курэй,

часта брэша здуру —

не нясуцца Куры.

 

 

Паскораны метад

Мала быў ляснічым Проў,

наламаў жа многа дроў.

 

Мадэрнае дзіця

Гэта хлопчык.

А хто — тата?

Не знайсці без адваката.

 

 

Метамарфоза

Быў Мікіта знакамітым,

як сядзеў ён ля карыта.

А прагналі ад карыта —

незаўважным стаў нібыта.

 

Трактат

Напісаў Лявон трактат —

вінегрэт з чужых цытат.

Пахваліў яго прафесар,

ён Лявону — родны брат.

 

«Перабудоўшчык»

 

Перабудове я

заўсёды рады,

пакіньце толькі мне

маю... пасаду.

 

 

«Кампанія» у калгасе

З ранку ў канторы — аўрал, бегатня,

лічаць бухгалтары і старшыня,—

як з фармалізмам змаганне вядзецца,

зводкі ў раён патрабуюць штодня.

 

«Брыгадны падрад»

Кажа брыгадзір механіку Алесю:

— Скокні, браце, на адной назе,

падмяні шліфоўшчыка, бо змерзне —

за віном стаіць ён у чарзе.

 

Рамонт

Стаў тэлевізар нешта «барахліць»,

і давялося майстра запрасіць.

Цяпер няма палос больш на экране —

бясконца ён мігціць, мігціць, мігціць...

 

Дружыннік-ілюзіяніст

— Ратуйце!.. Б’юць мяне! — пачуўся крык,

аж здрыгануўся ў небе маладзік.

Кудысьці раптам знік-прапаў дружыннік,

вось толькі тут стаяў і — бач ты! — знік...

 

Насуперак матэматыцы

Адзін сябрук мой добры, галоўбух,

дастаў адзін мне імпартны кажух,

я падпісаў яму адну паперку...

Чаму ж сядзім за кратамі мы ўдвух?