epub
 
падключыць
слоўнікі

Хведар Жычка

Вясна на Магілёўшчыне

Памяці Міколы Ткачова

 

Праз сотні тысяч вокнаў незашклёных

на Магілёўшчыну прыйшла вясна,

нібы фальгою каленкор зялёны,

лугі залоціць лотаццю яна.

 

Араты ў поле выйшаў давідна,

стаў на чале ён трактарнай калоны;

напятаю струной пралегла баразна,

каб паўтарыцца тыражом мільённым.

 

Як ні мудры і як ні разважай —

няма ў жыцці ў нас больш высокай мэты

чым клопат селяніна пра ўраджай.

 

Шануюць хлеб усе народы свету.

Невыпадкова круглы, як планета,

пячэцца на вяселле каравай.