epub
 
падключыць
слоўнікі

Хведар Жычка

"За дзень не ўбачыш чалавека..."

За дзень не ўбачыш чалавека,

пустуе старадаўні шлях —

змяло машынным нашым векам

з дарог вандроўнікаў, бадзяг.

 

А мне карціць на золку выйсці,

адчуць нагамі золь расы,

прывеціць вербы з мокрым лісцем,

рукой пагладзіць каласы,

 

паслухаць, як перад касьбою

звініць пад ветрам сенажаць,

і душны водар травастою

на грудзі поўныя ўдыхаць.