Парады маладым аўтарам
Пішаш, браце, прозу — тоўстыя раманы?
Не спяшай з канфліктаў гарадзіць гарод,
лепш, калі сюжэцік будзе твой туманны:
ні тупы, ні востры — нешта пасярод.
Ты — паэт?
Запомні, ехаць рызыкоўна
на кантрастах рэзкіх — каламазь і мёд...
Хай герой лірычны будзе памяркоўны:
ні змагар, ні мямля — нешта пасярод.
Публіцыст ты, браце?
З тэмаю надзённай
будзеш доўга біцца рыбінай аб лёд,
чытачу дай сёння нізку сцэн будзённых:
ні хлусню, ні праўду — нешта пасярод.
Для дзяцей ты пішаш кніжкі-маляванкі?
Не імкніся многа выдумляць прыгод,
наскубі бадылля і пляці пляцянку:
ані быль, ні казку — нешта пасярод.
Калі ж ты сатырык,
вырывай з карэннем
пустазелле злое, каб не выспеў плод,
і трымай надзейна у руках з натхненнем
ні мятлу, ні вілы — нешта пасярод,
Крытыкай заняўся?
Што ж, служы прагрэсу,
фіміямам славы акрапі ўмалот.
Будзь жа прынцыповым: не пускай у прэсу
ні ялей, ні доўбню — нешта пасярод.
Дык за працу, дружа!
Твор пішы і тут жа
сам чытай, каб іншым не ствараць турбот,
і лічы, што ты ўжо самабытны дужа:
ні чытач, ні аўтар — нешта пасярод.