Дружна з ахвотай,
Гэй, за работу,
Брацця, скарэй!
З песняю зычнай
Ў працы прывычнай
Будзе спарней.
Гора з нядоляй
Не знойдуць патолі
Болей сродзь нас;
Весела й хутка,
Мінута ў мінутку
Сойдзе нам час.
Ў стуку і груку
Забудзем мы муку
Працы сваёй.
Шчыра і смела
Гайда да дзела
Цеснай сям’ёй.
Там, дзе цярпенне
Родзіць імкненне —
Стане расці
Семя жывое
Шчасця людскога
Ў нашым жыцці.
Дружна з ахвотай,
Гэй, да работы,
Брацця, скарэй!
Праца рупная
Хай прывітае
Нас ўсіх хутчэй...
Вількамір, 1912