epub
 
падключыць
слоўнікі

Цішка Гартны

Каваль

Многа працы ў мяне —

Хоць ўсю пору працуй!

Грэй жалеза ў агне,

Вымай з горыну й куй.

Молат важкі трымай

Над кавадлам якраз,

Знізу ўверх паднімай,

Зверху ўніз, раз у раз.

Адвярніся наспех,

Як сумееш урваць —

Не забыцца, каб мех

У свой час паддуваць.

Адно іскры ў бакі

І да верху лятуць,

Як паважна з рукі

Малаты важка б’юць.

Раз — другі, і сашнік

Можа ў поле ўжо браць

Гарацешны мужык,

Сваю ніву араць.

Трэба шворан у воз —

Я згатую як след;

Абіць буксу калёс —

Я й да гэтага мэт.

Рукі знаюць настрой,

Молат ўслушны ка мне.

На ўсё жыцце цяжкой

Працы хопіць ў мяне.

 

Магілёў, 1911


1918

Тэкст падаецца паводле выдання: Збор твораў. У 4 т. Т. І: Вершы, 1909—1935. Апавяданні 1909—1927 / Аўт. прадм. С. Александровіч.— Мн.: Маст. літ., 1987.— 438 с.
Крыніца: скан