epub
 
Падключыць
слоўнікі

Цішка Гартны

Красуй, збожжа!

Красуй, збожжа майго краю,

Каласісь багата!

Жджэ за працу ураджаю

Ад цябе араты.

Хлебароб, аддаўшы сілы

Свайму полю-ніве,

Усміхнецца табе міла,

Што ты урадліва.

* * *

Красуй, збожжа майго краю,

Каб зярно злілося

У адплату аратаю

Ў ядрыя калоссі!

Сонца, з неба шлі праменні,

Залаці чароўна!

Ў землю кінута насенне —

Ўродзіць колас поўны.

* * *

Красуй, збожжа майго краю,

Убірай палеткі!

Хай з табою аратая

Весяляцца дзеткі.

Плён за працу верне ніва —

Ўцешыць думкі, вока,

Як паўныя вазы жніва

Пагрымяць да току.

 

Вількамір, 1910




Крыніца: скан

Беларуская Палічка: http://knihi.com