Маёй песні далі тоны
Мукаў стогны,
Што заўсёды пры рабоце
У смуродзе ды ў духоце
Вылівала маё сэрца.
Маёй веры дало сілы,
Што давіла
Маю душу бессціхання —
Бесканечнае змаганне,
Барацьба за шчасце й долю.
Далі гарт маёй надзеі
Злыя дзеі,
Што гадамі прада мною
Бесканечнай чарадою
Разбіваліся у шчэпы
Аб спрачання майго скрэпы.
Мая песня, мая вера
І мая надзея,—
З вамі йду я поўным ходам
Ў тыя дзверы,
Дзе ліхтарня міргацее
Прад свабодай.
Харкаў, 1918